Kisah Guru Zuhdi Mancing Tapi Tidak Di Kenali Orang

foto Abah Guru Zuhdi berpakaian biasa

Kisah lucu dari Abah Haji (Guru Zuhdi) yang alfaqir dangar langsung dari sidin malam rabu pas pangajian di rumah sidin tahun 2009.

Waktu Abah Haji maunjun lawan kakawanan sidin,ada urang tuha, tapi kada tuha banar pang. Sekitar umur 50an lah lakian. Imbah itu lakian tadi mamaraki sidin. Waktu itu Abah Haji maunjun pakai baju kaos biru tangan handap pakai selawar kain warna hirang, kada pakai kupiah.

Imbah diparaki lakian tadi lalu baucap lawan abah Haji si lakian tadi.jer lakian tadi "ikam asa mirip lawan H.Zuhdi yang pangajian malam rabu disungai jingah.asa iya asa kada pang jer lakian tadi madahi abah Haji.abah Haji kadada bapander cuma senyum ja sidin. Lalu lakian tadi manakuni pulang lawan abah Haji, "Ikam parnah lah ka pangajian H Zuhdi? dijawab abah Haji pernah ae.

Jer lakian tadi, "Aku hanyar sakali ke pangajian di situ meantar cucuku pas tabalujur hujan harinya, paksa'ae kuumpat jua duduk, tapi basalawar ja pang mandangarakan," jer lakian tadi pulang. Lucu jua lah H.Zuhdi tuh bacaramah, lucut ku tatawa kaya pelawak."

Abah Haji badiam haja cuma senyum ja. Si lakian tadi maunjun jua pas bahigaan lawan Abah Haji Cuma lakian ne dasar kada tahu muha abah Haji, hanyar sakali ka pengajian Abah Haji malam rabu, itu pun tabalujur jua meantar cucu sidin pas hujan harinya.

Kada lawas lakian tadi handak bulik karna cucu sidin meambili. Cucu sidin rupanya pinandu lawan Abah Haji karna rancak turun majlis sidin pang jadi pinandu. Dipadahi si cucu lakian tadi, "Kai, tu Guru Zuhdi di higa pian, kenal kah pian jadi patuh banar."

Dikira si cucu tadi bapanderan kaya kakawanan akrab sakalinya lakian tadi kada pinandu lawan abah Haji. Kada jadi naik kandaraan, lakian tadi langsung basalaman lawan Abah Haji. Jer lakian tadi, "Kada pinandu pada pian Guru Zuhdi. Minta rela gurulah ," jer lakian tadi. Jawab Abah Haji, inggih sama2 puun. Jaka kada cucu ulun madahe pian Guru Zuhdi kada tahu ulun jer lakian tadi madahe abah Haji. Imbah tu lakian tadi bulek imbah basalaman lawan Abah Haji.

Dahulu pangajian Abah Haji mun di rumah sidin tiap malam rabu lawan di pondok indah malam selasa, di mesjid raya sabilal sama ja kaya dulu malam jum'at lawan di mesjid jami' malam minggu.
Kita do'akan mudahan abah Haji dan keluarga panjang umur, disehatkan badan dan dimudahkan urusan. Barkat kita mamuji paguruan kita jua mamuji Rasulullah SAW. Barkat kita mahimungi paguruan kita jua mahimungi Rasulullah SAW.

________________________________
sumber akun FB Ahbab Muhammad

Artikel Terkait